བྱེའུ་ཆུང་གཤོག་ཁྲ་ཞིག་ཁང་བའི་བད་ཀར་ཡིབས་ནས།།
འཇིག་རྟེན་སྐྱིད་སྡུག་གི་མངར་སྐྱུར་རེས་མོས་མྱོང་ཞིང་།།
ཡུལ་དྲུག་མེ་ཏོག་གི་རྒུམ་བུ་མཉམ་དུ་རོལ་དུས།།
དྲུག་པའི་ཆར་ཟིམ་འདི་ཁྱོད་ཀྱི་ལོངས་སྤྱོད་ཡིན་ཨང་།།
ནམ་ཞིག་ང་རང་ནི་ཚེ་ཡི་འཕེན་པ་གཏོང་དུས།།
དུར་སའི་ཞིང་ཁམས་སུ་རྡོ་དང་ཤིང་གིས་སྟོང་སྟེ།།
དྲུག་པའི་ཆར་ཟིམ་དང་ཡང་ན་ཁ་བ་མཉམ་དུ།།
སྦས་དགོས་ལུང་བསྟན་འདི་རང་གིས་རང་ལ་རྒྱབ་ཡོད།།
ཆར་གདུགས་སེར་པོ་ཡི་རི་མོ་གསལ་མ་ནོག་རེད།།
སྟེང་གི་ཐིགས་སྒྲ་འང་རྣ་བའི་བཅུད་དུ་ལེན་ཞིང་།།
ལག་པ་ལག་པ་རུ་འཁྲིལ་བའི་དུས་ཤིག་ཡོད་ན།།
དྲུག་པའི་ཆར་བ་འདི་འུ་གཉིས་སྐལ་བ་ཡིན་བཞག །
སྡིག་སྒྲིབ་ཀྱི་རྔུལ་ཆུ།
ཁྱེད་ནི་མེ་ཏོག་གི་བར་ནས་དགོད་ཀྱིན་པ།།
ང་ནི་བྱེ་མ་ཡི་ནང་ནས་ནུར་འགྲོས་བྱས།།
ཆར་ཆུ་ཐིགས་པ་གཅིག་ལ་མི་རེ་ཁྱེད་ཀྱི་གྲིབ་མ་གནོངས་ཤོག །
ཕན་དང་མི་ཕན་མི་དོགས་བདག་ལ་ཁྱེད་ཀྱི་དངོས་གྲུབ་རྩོལ་རོགས།།
སྟོད་ཉི་མའི་གྲོང་གི་ཚ་བ།།
གཟུགས་སྐྱ་མོའི་སྟེང་གི་རྔུལ་ཆུ།།
ཟླ་བ་སྒྲོལ་མ།། བསིལ་བསིལ་གནོངས་དང་།།
མགུར་ལ་སིམ་པའི་རྣམ་ཤེས།
རི་རྩེ་གསུམ་ན་སྨུག་པ་ལིང་ལིང་།།
འཐོངས་ནམ་མཁའ་ནས་སྦྲང་ཆར་ཟིམ་ཟིམ།།
བྱ་བྱེའུ་ཡིས་གླུ་སྐད་ཀྱུར་ཀྱུར།།
རྩྭ་རྩི་ཤིང་གི་དྲི་ཞིམ་ཐུལ་ཐུལ།།
ས་ཐག་རིང་གི་ཐག་རིང་མཐའ་ན།།
ཡུལ་རྒྱང་རིང་གི་རྒྱང་རིང་ཡུལ་ན།།
ཆོས་སྟོང་ཉིད་ལ་གློ་བ་གླན་དུས།།
དབྱིངས་རང་རིག་གི་མ་བུ་འདྲིས་དུས།།
ཡུལ་ཡུལ་ཅན་གྱི་ངོ་བོར་ཐིམ་དུས།།
བློ་རྟོག་མེད་ཀྱི་རང་ངོ་ཤེས་དུས།།
དོན་བདེན་མེད་ལ་རེ་དོགས་བྲལ་དུས།།
ཆོས་གདོད་མ་ཡི་གནས་ལུགས་ཁྲ་མོ།།
ཆོས་ཕྱག་ཆེན་གྱི་ལྟ་བ་ཁྲ་མོ།།