༄༅།།ཀུན་གཟིགས་པཎ་ཆེན་སྐུ་ཕྲེང་བཅུ་པ་སྙིང་ནས་དྲན།
མཁྱེན་བརྩེ་ནུས་པའི་ཡོན་ཏན་ཀུན་གྱིས་ཕྱུག།
མ་རིག་ལམ་བཟང་སྟོན་པའི་སྒྲོན་མེ་གསལ།།
སྙན་པའི་རྫ་རྔ་སྲིད་གསུམ་རྩེ་རུ་གྲགས།།
ཀུན་གཟིགས་པཎ་ཆེན་མཆོག་ལ་གུས་པས་འདུད།།
སྐུ་ཡི་བཀོད་པ་མདོ་སྨད་ལྗོངས་སུ་འཁྲུངས།།
གསུང་གི་བདུད་བརྩི་འཛམ་གླིང་རིས་མེད་ཁྱབ།།
ཐུགས་བརྩེའི་ཉིན་བྱེད་མ་ལུས་ཕྱོགས་བཞིར་འཕྲོས།།
ཁྱེད་ཉིད་འགྲོ་ཀུན་སྐྱོང་བའི་སྐྱབས་མགོན་ལགས།།
རྒྱུ་སྐར་དབུས་སུ་བཅོ་ལྔའི་ལྷ་ཟླ་བཞིན།།
ལྷང་ངེར་མངོན་པའི་ཀུན་གཟིགས་རིན་པོ་ཆེའི།།
མི་ཚེའི་མཛད་འཕྲིན་གོ་ལ་ཟླུམ་པོས་ཀྱང་།།
མ་ཐེག་ཡོམ་ཡོམ་གཡོ་བའི་ཚུལ་འདི་རྨད།།
ཉམ་ཐག་འགྲོ་ཀུན་སྡུག་བསྔལ་རྒྱ་མཚོ་ལས།།
སྐྱོབ་ཕྱིར་རང་ཉིད་དོན་མེད་བཙོན་འོག་ཏུ།།
བགྲང་བྱ་དགུ་ལྷག་བཅུག་ནས་མནར་གཅོད་མྱངས།།
ཀུན་ཀྱང་འབངས་ལ་བདེ་སྐྱིད་བསྐྲུན་ཕྱིར་བསྔོས།།
ཡིག་འབྲུ་ཁྲི་བདུན་རྣོ་དབལ་རལ་གྲི་ཡིས།།
གཉོམ་ཆུང་འབངས་ལ་འཚེ་བའི་བདུད་དཔུང་ཚོགས།།
སྐད་ཅིག་ཙམ་ལ་རྨེག་མེད་བཅོམ་པའི་ཚེ།།
ཕན་བདེའི་འོད་དཀར་གངས་ལྗོངས་ཡུལ་དུ་འཕྲོས།།
དྲང་བདེན་རིས་མེད་སྐྱོང་བའི་ཕ་མ་དང་།།
འཁྱོག་བཤད་ཉོག་བཤད་སེལ་པའི་བློ་རིག་རྣོ།།
སྤོབས་པ་ཆེན་པས་གཏམ་གྱི་སྒོ་མོ་འབྱེད།།
བརྩོན་འགྲུས་གཞལ་མེད་ལྷས་ཀྱང་བསྔགས་པ་ཤོར།།
ལྷག་བསམ་དཀར་བོའི་རྒྱལ་མཚན་རྣམ་པར་མཐོ།།
དད་ལྡན་མང་ཚོགས་སྙིང་གི་དབུས་སུ་བཞུགས།།
རང་གི་ཕྱག་ཀྱང་བསྐྲངས་ནས་འདེགས་དཀའ་ཡང་།།
མཇལ་བ་ཁྲི་ཕྲག་མང་བོའི་རེ་བ་བསྐངས།།
ཆོས་སྐད་ཟིལ་གནོན་དྲགས་པོའི་བྱིན་རླབས་ཀྱིས།།
ཁམས་གསུམ་མ་ལུས་ཞི་བའི་བདེ་ལ་བཀོད།།
བྱང་ཆུབ་སེམས་ཀྱིས་མཛད་པའི་བཀའ་སློབ་མཐུས།།
འགྲོ་བ་ཀུན་གྱི་སེམས་སྡུག་རྨང་ནས་སེལ།།
རང་གི་རྒྱལ་ཁབ་ཆེན་པོའི་དབུ་འཛིན་གྱིས།།
མཆོད་བསྟོད་ལེགས་སྐྱེས་འབུལ་བ་ཕར་ཞོག་དང་།
ཕྱི་གླིང་རྒྱ་གར་ཆེན་པོའི་རྒྱལ་པོས་ཀྱང་།།
བསྔགས་པའི་གསེར་གྱི་མེ་ཏོག་འཛིན་མར་འཐོར།།
མི་རིགས་སྐད་ཡིག་རང་གི་བླ་སྲོག་ལྟར།།
སྲུང་སྐྱོང་དགོས་པའི་བཀའ་སློབ་ནོར་བུ་གནང་།
མི་རིགས་འཆམ་མཐུན་དཔྲལ་པའི་མིག་ཟུང་བཞིན།།
གཅེས་འཛིན་དགོས་པའི་སྙིང་གཏམ་དྲོད་མོ་བསྙད།།
རང་རིགས་ཕུ་ནུ་སྤུན་མཆེད་གང་ཡིན་ཀྱང་།།
ས་རྩོད་ཆུ་རྩོད་གནའ་ནས་ད་ལྟའི་བར།།
མ་ཆད་ཕན་ཚུན་གསོད་རྨས་ངན་པའི་ལུགས།།
མྱུར་དུ་འདོར་དགོས་བསླབ་བྱ་ནན་མོ་མཛད།།
རང་རིགས་རྗེས་ལུས་རྣམ་པ་མ་བསྒྱུར་ན།།
བདག་ཉིད་ཤི་ཡང་མིག་ཟུང་མི་བཙུམ་པའི།།
ཆོད་སེམས་དམ་པོས་འགྲོ་བ་ཁྲི་མ་འབུམ།།
མདུན་མཆོང་སྙིང་སྟོབས་བླ་མེད་སྦྱིན་པ་མཚར།།
སྐད་རིགས་སྣ་མང་ཤེས་ན་བཟང་མོད་ཀྱང་།།
རང་སྐད་བརྗེད་ན་ངོ་ཚ་ཡིན་པའི་གསུང་། །
ཉག་ཕྲ་སྙིགས་མའི་དུས་ཀྱི་བོད་སྐད་འདིར།།
བླ་སྲོག་གཉིས་པ་གནང་པའི་ནུས་ཆེན་ཐོན།།
བདག་གིས་རང་རིགས་བུ་རབས་ཚ་རྒྱུད་ཀྱི།།
མཚན་སྙན་གནོད་པའི་ཤུལ་རྗེས་ཕྲ་མོ་ཙམ།།
རང་གི་ལོ་རྒྱུས་ནང་དུ་མི་འཇོག་པའི།།
དམ་བཅའ་རྡོ་རྗེ་བྲག་ལྟར་མཛད་པ་རྨད།།
རིག་གནས་སྲོལ་རྒྱུན་རྨད་བྱུང་འཛིན་སྤེལ་དང་།།
དེང་རབས་ཚན་རིག་རིག་གནས་སློབ་སྦྱོང་གཉིས།
གཅིག་ལ་གཅིག་བརྟེན་འབྲེལ་བ་དམ་པས་ན།།
མདུན་སྐྱོད་གཤོག་ཟུང་ཡིན་པའི་བཀའ་སློབ་མཛད།།
ལོ་རྒྱུས་འོད་ཟེར་ལྡན་པའི་མི་རིགས་ཤིག།
སྐད་ཡིག་རྒྱན་གོས་གོམས་གཤིས་བཟང་བོ་སོགས།།
མི་འགྱུར་བརྟན་པོའི་གོ་གནས་གལ་ཆེན་བཟུང་།།
རྣམ་ཀུན་སྲུང་སྐྱོབ་དགོས་པའི་བསླབ་བྱ་གནང་།།
བོད་པ་སུས་ཀྱང་བོད་ཡིག་ཤེས་ཟིན་ན།།
དགེ་སྡིག་སྤང་བླང་ལེགས་ཉེས་དཀར་ནག་སོགས།།
གསལ་འབྱེད་བླང་དོར་བགྱིད་པའི་རྣམ་དཔྱོད་མཆིས།།
དང་པོ་རང་ཡིག་སློབ་དགོས་སྙིང་གཏམ་གསུངས།།
རྙེད་དཀའ་འཇིག་སླའི་མི་ལུས་རིན་ཆེན་འདི།།
མཐའ་ཡས་འགྲོ་ཀུན་སྡུག་བསྔལ་སེལ་བའི་སླད།།
ཟུངས་ཁྲག་དྲོན་མོ་མ་ལུས་བསྟིམས་ནས་ཟད།།
བདག་པས་གཞན་གཅེས་རྒྱལ་སྲས་སྤྱོད་པ་རྨད།།
ཁྱེད་ཀྱི་མཛད་འཕྲིན་འབྱམས་ཀླས་ཆུ་གཏེར་ལས།།
ཆུ་ཐིགས་ཙམ་ཞིག་བླངས་ནས་བརྗོད་པ་འདིས།།
གཞན་ཕན་འཕྲིན་ལས་རྒྱ་ཆེར་འགྲུབ་དཀའ་ཡང་།།
ཁོ་བོའི་བརྗོད་འདོད་བསམ་བློ་འགྲུབ་པར་ཤོག།
2017ལོའི་ཟླ1པའི་ཚེས28ཉིན་ཏེ་རྒྱ་ལོ་ཚེས་གཅིག་ལ་ཡང་བསྐྱར་དག་བཅོས་དང་ཁ་གསབ་བརྒྱབ་བ་དགེའོ།།