མི་ཚེ་རིང་།
ཉིན་གཅིག་གི་ངལ་བ་ཡོད་ཚད
ཤར་རིའི་རྩེ་མོར་བཞག་ཅིང
བསམ་གཞིག་ཅིའང་མེད་པར་ནུབ་རིར་ཆས་དུས
དེ་རིང་གི་སུན་སྣང་དང་ངལ་བ་ཅི་རིགས་ཀྱང
སྣང་སྟོང་གི་རྨི་ལམ་ཙམ་སྟེ ཟིན་པ་ཅི་ཡང་མེད་པར
ཉི་ཟེར་དང་ཐལ་རྡུལ་དུ་འདྲེས།
སྐབས་དེར་ཉི་འོད་ཀྱི་ཚ་དྲོད་ཡལ་ཞིང
མུན་ནག་གིས་ལག་སྙོམས་བྱེད་བཞིན་ཚུར་ལ་འོང
ལྷས་མཐའ་ན་ལུག་ཁྱུའི་འབའ་སྐད་མོད
ཕ་ཀིའི་རི་ཤོད་ནས་ལུ་གུ་ཞིག་ཀྱང་སྤྱང་ཀིས་ཁྱེར་སོང
ཨ་ཧ་བོ ད་ཅི་བྱ མེ་མདའ་དེའང་སྔ་མོ་ནས་བོར་ཟིན།
འཁྲུལ་བཞེངས་ཀྱི་ཡུལ་གྲུ་འདིའང་རྔམ་ཇེ་ནག་ཏུ་གྱུར
གློ་བུར་གློ་བུར་དུ་ཉི་མའང་ནུབ་པར་གྱུར
དགོང་ཁའི་མཚམས་སྤྲིན་གྱིས་འོད་དམར་ནག་ཅིག་བསྡུས་ཏེ
འཇིག་རྟེན་འདིའང་གློ་མདངས་ཀྱིས་བཀླུབ་དེ་གོ་ལ་གཞན་ཞིག་ཏུ་བཟོས།
ངའི་སེམས་པ་གཟེར་ཀི འཁྱགས་ཀི
ཆམ་ནད་ཅིག་ཀྱང་ཕོག་ཟིན
འོན་ཀྱང་སང་ཉིན་གྱི་ཆེད་དུ ང་ངེས་པར་ནར་སོན་དགོས
ངས་ད་དུང་སང་ཉིན་གྱི་ཉི་འོད་ལ་སྒུག་དགོས
འཚོ་བ་རོལ་དགོས ཆུང་མ་ལེན་དགོས
བདག་པོ་མི་འཛིན་པའི་སྒོ་ཁྱི་ཞིག་ཀྱང་གསོ་དགོས།