བཙན་བུ།（ཟི་ལིང）
སྟོན་ཀའི་རྣམ་པ་ལས
ངས་གཞི་ནས་ཞིང་ལས་ལ་བྲེལ་བའི་ཕུ་ནུ་མིང་སྲིང་དྲན་འོངས
གནའ་སྔ་མོ་སྔ་མོ་ཞིག་ལ
རོང་གི་ས་ཆར་ཨ་ཕས་ས་བོན་གཏོར་མྱོང་ལ
ཨ་མས་ཞིང་ལ་ཡུར་ཆུ་དྲངས་མྱོང
ཚ་བ་ཆེ་བའི་དུས་ཚིགས་ཤིག་ལ་ལོ་ཏོག་སྡུད་ཞོར
ཀེ་ཚེ་ཚོད་མ་དང་རྩམ་པ་ཟོས་མྱོང
ཞིབ་འདང་རེ་བརྒྱབ་ན་སྐབས་དེར་ང་ཚོ་ཧ་ཅང་གཉོམ་རུང སེམས་པ་དེ་སྐྱིད་པོ་སྐྱིད་པོ་ཞིག
རུ་སྤོར་བའི་རྣམ་པ་ལས
ངས་གཞི་ནས་ཕྱུགས་ལས་ལ་བྲེལ་བའི་ཕུ་ནུ་མིང་སྲིང་དྲན་འོངས
སྔོན་མ་སྔོན་མ་ཞིག་ལ
འབྲོག་གི་ས་ཆར་ཨ་ཕས་སྦྲ་ནག་ཕུབ་མྱོང་ལ
ཨ་མས་མར་ལོ་དཀྲུགས་མྱོང
རྫ་སྨུག་པོའི་གོང་ཁ་རུ་ནོར་ལུག་འཚོ་བཞིན
རི་ཆུ་ལུང་གསུམ་བདག་ཏུ་གཟུང
ང་ཚོས་འབྲི་མོའི་འོ་མ་དང་བོད་ལྭ་གྱོན་མྱོང
ཞིབ་འདངས་རེ་བརྒྱབ་ན་སྐབས་དེར་ང་ཚོ་ཧ་ཅང་གཉོམ་རུང སྣང་བ་དེ་བསོར་མོ་བསོར་མོ་ཞིག
གྲོང་ཁྱེར་གྱི་གནོན་ཤུགས་ལས
ངས་གཞི་ནས་ས་འདིར་གནས་སྤར་ཡོང་བའི་ཕུ་ནུ་མིང་སྲིང་དྲན་འོངས
ན་ནིང་ད་ལོ་ཞིག་ལ
རྒྱ་གྲོང་འདིར་ཨ་ཕར་བསང་ཕུད་སའི་ས་མེད་ལ
ཨ་མས་སྙིང་ཉེ་བའི་ལུག་ཁྱུ་བོར་ནས
མིང་སྲིང་ཚོས་རྟ་འདོ་བའི་སྤུ་མདོག་བརྗེད་ཟིན
ད་དུང་མང་པོ་མང་པོ་ཞིག
ཞིབ་འདངས་རེ་བརྒྱབ་ན་དེང་སྐབས་ང་ཚོ་ཧ་ཅང་སྐྱིད་རུང སེམས་པ་འདི་བདེ་མོ་བདེ་མོ་ཞིག་མིན
དོ་ནུབ། ཁ་རོག་སྡོད་དོན་ཡེ་ནས་མི་འདུག
ཁྱོད་ངོ་ཤེས་དུས
དབྱར་གཞུང་གི་ཉིན་མོ་ཞིག་ཡིན
གནམ་ན་སྤྲིན་པ་ཡུག་གཅིག་ཀྱང་མེད
ཁྱོད་ངོ་ཤེས་དུས
དབྱར་ཟླ་དྲུག་པའི་ཉིན་མོ་ཞིག་ཡིན
སྤང་ན་ནོར་ལུག་གཅིག་ཀྱང་མེད
ཉིན་མོ་དེར
རྨ་ཆེན་གངས་རིའི་ས་ནག་ཁ་མདོ་ནས
གངས་ཆུའི་ལྷོད་ཤ་ལ་སེམས་པ་གླེན་བཞིན
མེ་ཏོག་སེར་ཆེན་གྱི་མཛེས་ཉམས་གླེང་བཞིན
མཉམ་པར་རེ་བརྒྱབ་པ་དྲན་ན
དོ་ནུབ
དབྱར་གཞུང་གི་མཚན་མོ་ཞིག་ཡོད་ཡོད་ལ
འུ་གཉིས་ཁ་རོག་སྡོད་དོན་ཡེ་ནས་མི་འདུག