གངས་ཞུན།
ང་ཚོ་འཐབ་མོ་བ་ཡིན
ང་ཚོ་ནམ་ཡང་འཐབ་ར་ན་ཡོད
ཁྱོད་དཔའ་ང་རྒོད་ཀྱི་དཔལ་འབྱོར་ཚོང་རའི་འཐབ་ར་ན་ཡོད
ང་ཚོར་མཁོ་བ་ནི་འཐབ་གྲོགས་ཡིན།
ང་ཚོ་དཔལ་རྟུལ་ཡིན
ང་ཚོས་ནམ་ཡང་དཔའ་ཁ་འགྲན་བཞིན་ཡོད
ཁྱོད་རྒྱལ་ང་ཕམ་གྱིས་འཚོ་གནས་རྩོད་པའི་དཔའ་ཁ་འགྲན་བཞིན་ཡོད
ང་ཚོར་དགོས་པ་ནི་དཔའ་སྙིང་ཡིན།
ང་ཚོ་གདོང་མཆོངས་བ་ཡིན
ང་ཚོ་ནམ་ཡང་ཉེན་ཁའི་མདའ་མགོ་ན་ཡོད
ཁྱོད་ཤི་ང་གསོན་གྱིས་རྒྱུ་འབྲས་བདེན་དོན་འཕྲོག་པའི་མདའ་མགོ་ན་ཡོད
ང་ཚོ་སྨོན་པ་ནི་སྤྱང་གྲུང་ཡིན།
གཡུལ་ས་འདི་ནི་ང་ཚོའི་ཚེ་གང་གི་འཐབ་ར་ཡིན
འདི་ནི་ཡུལ་ལུང་གི་འཐབ་ར་ཡིན སེམས་ཁམས་ཀྱི་འཐབ་ར་ཡིན དཔལ་ཡོན་གྱི་འཐབ་ར་ཡིན མཐར་ཐུག་གི་འཐབ་ར་ཡིན།
འདི་ན་ང་ཚོའི་རིག་གནས་ཡོད ང་ཚོའི་དད་པ་ཡོད ང་ཚོའི་རྨི་ལམ་ཡོད། ང་ཚོའི་དཔའ་རྩལ་ཡོད ང་ཚོའི་གདུང་འབོད་ཡོད ང་ཚོའི་དུར་ས་ཡང་ཡོད།