ལོ་རྒྱུས་ཀྱི་འབྱུང་ཁུངས།
འུར་ཆ་ཞེས་པའི་ཁྱད་དུ་འཕགས་པའི་རིན་བྲལ་གྱི་ནོར་བུ་འདིའི་གསར་གཏོད་མཁན་འདི་ཡིན་དང་ལོ་རབས་འདི་ཡིན་ཞེས་བཤད་པར་ཧ་ཅང་དཀའ་མོད། འོན་ཀྱང་རྒན་རབས་ཤེས་པ་ཅན་གྱི་ངག་རྒྱུན་ལྟར་ན། ཡ་ཐོག་དམུ་བཙན་གྱི་དབང་བསྒྱུར་སྐབས་འུར་ཆ་ནི་དམུ་བཙན་གྱི་གོ་མཚོན་བཅུ་གཉིས་ཀྱི་ཡ་གྱལ་ཞིག་ཡིན་པར་གྲགས། དེ་བཞིན་མ་སངས་སྤུན་དགུའི་དུས་ལ་མ་སངས་ཡ་རུ་ཁྲ་ཡི་ལག་ཆ་ཡིན་པར་གྲགས། རྒྱལ་ཕྲན་སིལ་མ་བཅུ་གཉིས་དང་བཞི་བཅུའི་སྐབས་གཙོ་བོ་སྲོག་ཆགས་འགུག་འདུལ་ལ་སྤྱོད་པར་གྲགས། སྤུར་རྒྱལ་བཙན་པོའི་སྐབས་སུ་བློན་ཆེན་པོ་རྣམས་ཀྱི་སྐེད་པར་བཏགས་ནས་རང་སྲུང་མཚོན་ཆར་བརྩི། བོད་སིལ་བུའི་སྐབས་དམག་འཛིང་སོགས་ལ་བེད་སྤྱོད་བྱེད་པ་ཙམ་མ་ཟད་སོག་པོ་དང་དབྱིན་འགོག་སྐབས་དམག་འཛིང་གི་མཚོན་ཆར་སྤྱོད་པར་གྲགས། ཕྱིས་སུ་བོད་ཁུལ་ཡོངས་རྫོགས་ལ་སྲོག་ཆགས་འགུག་འདུལ་དང་ལུས་ཀྱི་རྒྱན་ཆ། རྒྱུན་སྤྱོད་ཀྱི་ལག་ཆ་སོགས་སུ་བེད་སྤྱོད་བཞིན་ཡོད།
ཐག་པའི་མཐིལ་དུ་རྡོ་བླུགས་ནས་རྒྱང་ཐག་རིང་པོར་འཕེན་པར་ཟེར། ཐག་པ་རིང་ཚད་སྤྱི་ཁྲེ་གང་དང་ཕྱེད་ཀ་ཙམ་ཡོད་པ་ལ་ཐག་པའི་དཀྱིལ་དུ་རྡོ་བླུགས་ས་འུར་མཐིལ་ཞེས་པ་ཅུང་ཆེ་བ་ཞིག་ཡོད། ཐག་སྣེ་གཅིག་ལ་འུར་ལྕེ་ཞེས་པ་ཐག་པ་ཕྲ་པོ་ཞིག་བསྒར་ཡོད་པས་འུར་རྡོ་འཕེན་སྐབས། འུར་ལྕེས་སྐད་སྒྲ་ཐོན་པ་དང་། ད་དུང་རྔ་དམར་རྒྱན་ཡང་སྤྲས། འུར་ཆ་ནི་བོད་རིགས་རོང་འབྲོག་མང་ཚོགས་དང་། ལྷག་པར་འབྲོག་ཁུལ་གྱི་ཕྱུགས་རྫིའི་མེད་དུ་མི་རུང་བའི་སྟབས་བདེ་ལ་གོ་ཆོད་པའི་ལག་ཆ་བཟང་པོ་ཞིག་ཡིན། ཞིང་པས་ཞིང་སྲུང་དང་ནགས་སྲུང་། ཕྱུགས་རྫི་བ་རྣམས་ཀྱིས་ཕྱུགས་ཁྱུ་འདེད་འགུག ཕྱུགས་རིགས་ལ་གནོད་པའི་གཅན་གཟན་འགོག་པ་སོགས་བྱེད་ཐུབ་པར་མ་ཟད། ད་དུང་དགྲ་འཐབ་ཀྱི་ཐོག་མཚོན་ཆའི་གོ་ཡང་ཆོད་ཐུབ། དེ་སྔ་བོད་རབ་བྱུང་བཅོ་ལྔ་པའི་ཤིང་འབྲུག་ལོར་དབྱིན་ཇི་བཙན་རྒྱལ་རིང་ལུགས་པས་བོད་ལ་བཙན་འཛུལ་བྱེད་སྐབས། བོད་རིགས་མི་དམངས་ཀྱིས་དཔའ་ངར་ཆེན་པོས་བཙན་འཛུལ་པར་འགོག་རྒོལ་བྱེད་སྐབས་འུར་ཆ་བེད་སྤྱོད་བཏང་ཡོད་ལ་ནུས་པ་ཆེན་པོ་ཐོན་པར་གྲགས།
འུར་ཆའི་བཟོ་སྟངས།
1.དང་པོ་སྐུད་པ་ཚོས་གཞི་སྣ་ཚོགས་དང་། སྤུ་རིགས་དཀར་ནག ལྤགས་པ་མཉེད་མའི་རྒྱུན་བུ། ཧེལ་ཀེ་སོགས་ཀྱིས་འུར་ཆའི་སྤྱི་སྒྲོམ་བསླ་དགོས།
2.ལྗགས་ལུང་ཞེས་ལྗགས་རྩེ་འདོགས་ས་རིལ་པོ་ཞིག་བསླ་དགོས།
3.མ་མཆོག་ཞེས་འུར་ཆའི་ཆ་གསུམ་ལ་དགོས་པའི་དུམ་བུ་གཅིག་བསླ་དགོས།
4.འུར་མཐིལ་ནི་སྐུད་པ་ཁག་གཉིས་ལ་དབྱེ་ནས་བསླ་དགོས་པ་དང་། ཆ་ཚད་ནི་མཛུབ་ལུང་ངམ་དཔའ་ལུང་གི་ཕྱེད་ཀ་ཡིན་དགོས། འུར་མཐིལ་ལ་སྣམ་བུ་དང་སྤུ་ཕྲུག་སོགས་ཀྱི་སྟེང་དུ་སྲོག་ཆགས་དང་དེ་མིན་རི་མོ་སྣ་ཚོགས་བཀོད་བཞིན་ཡོད། གཞན་ཡང་འུར་ཆའི་སྐུད་པ་ལེབ་མོར་བཙེམས་ནས་བཟོས་པ་ལ་ཇག་པའི་འུར་མཐིལ་ཞེས་འབོད།
5.རྡོ་འགྲིམས་ནི་འུར་ཆའི་མཛེས་ཆོས་ཆེ་ཆུང་ཙམ་མ་གཏོགས་ཚང་མ་ལེབ་མོ་ཞིག་བསླ་དགོས། ཆ་ཚད་ནི་འུར་མཐིལ་གྱི་ཕྱེད་ཀ་ཡིན།
6.ཡ་མཆོག་ནི་འུར་ཆའི་ཆ་གསུམ་གྱི་དུམ་བུ་གཅིག་ཡིན་པ་དང་། ཆ་ཚད་འཇལ་སྐབས་རྡོ་འགྲིམས་ནི་ཡ་མཆོག་གི་ཁོངས་སུ་འདུས།
7.མཛུབ་ལུང་གི་རིང་ཐུང་ནི་འུར་ཆ་དུམ་བུ་གསུམ་ལ་དགོས་པ་ལས་གཅིག་ཡིན། མཛུབ་ལུང་བསླས་ཚར་རྗེས་ཉིས་འགུགས་བསླ་དགོས།
8.ཨོལ་ཀྲོང་ནི་མཛུབ་ལུང་དང་ཡ་མཆོག་གཉིས་ཀྱི་མཐུད་མཚམས་སུ་སོར་གང་ཙམ་ཞིག་བཏུམས་ནས་བསླེ་དགོས།
9.ལྗགས་རྩེ་ནི་རྒྱུ་བལ་ལས་གྲུབ་པའི་སྐུད་པ་སུམ་སྒྲིལ་བཞིའམ་དྲུག་དང་བརྒྱད་སོགས་ལེབ་མོར་བཙེམ་དགོས།
10.ཁ་ཚར་མཛེས་ཆོས་ཆེད་དུ་སྐུད་པ་ཚོས་གཞི་སྣ་ཚོགས་ཀྱི་ཁ་ཚར་ཆུང་བུ་འགའ་རེ་སྦྱར་སྲོལ་ཡོད། །