ཀྲུང་གོ་བོད་ཀྱི་དྲ་བ།

བོད་ལུགས་གསོ་རིག་ལས་ལྕེའི་མདོག་ལ་བརྟག་ཐབས་རགས་ཙམ་བཤད་པ།

ཡོང་ཁུངས། : བདེ་ཆེན་བོད་ཡིག་ཚགས་པར།     སྤེལ་དུས། : 2018-11-15
ཡིག་གཟུགས། :ཆུང་། འབྲིང་། ཆེ།

ཉེས་གསུམ་འཕེལ་ཟད་འཁྲུགས་གསུམ་དུ་གྱུར་ཚེ་རྗེས་མཐུན་གྱི་ནད་རྟགས་ལྕེ་ལ་ཤར་བས་ལྕེ་མདོག་ལ་འགྱུར་ལྡོག་སྣ་ཚོགས་འབྱུང་། རྒྱུན་མཐོང་གི་ལྕེའི་མདོག་ནི་དམར་པོ་དང་། སེར་པོ། སྔོན་པོ། དཀར་པོ། ནག་པོ་བཅས་རྩ་བའི་མདོག་ལྔ་དང་ལྡན་ལ། གཞན་ཁམ་མདོག སྨུག་མདོག སྐྱ་མདོག་བཅས་ནི་གོང་གི་ཁ་དོག་དེ་དག་འདུས་འདྲེས་བྱས་པ་ལས་བྱུང་ཞིང་དེ་དག་ཕལ་ཆེར་ནད་རྐྱང་པ་དང་ལྡན་འདུས་དང་འབྲེལ་བ་དམ་པོ་ཡོད་པར་སྙམ།

གཅིག  ལྕེ་མདོག་དམར་པོ།

ལྕེའི་མདོག་དམར་པོ་ཆགས་པ་ནི་ཁྲག་དང་མཁྲིས་པའི་རང་མདོག་དང་། རླུང་འཕེལ་བ་དང་འཁྲུགས་པ་གང་རུང་དུ་གྱུར་ན་ཡང་ལྕེ་མདོག་དམར་པོ་མངོན། གཞན་དོན་སྣོད་དང་ལྡན་འདུས་ཀྱི་ནད་ཁ་ཤས་ཤིག་ལའང་ལྕེ་མདོག་དམར་པོ་འབྱུང་། ལྕེ་མདོག་དམར་དྲག་ན་ཚ་བའི་རྟགས་དང་། ལྕེ་མདོག་དམར་ལ་ངོ་བོ་སྐམ་པ་ཕོ་བར་གནོད་པ་བྱུང་བའི་རྟགས། ལྕེ་མདོག་དམར་ལ་ངོ་བོ་སྐམ་པ་དང་དྲེག་མེད་པ་ནི་ལུས་ཀྱི་ཆུ་ཁམས་ལ་གནོད་པ་བྱུང་བའི་རྟགས། ལྕེ་མདོག་དམར་ལ་དྲོད་ཡོད་ན་ཚ་བའི་རྟགས་དང་ལུས་སྟོབས་ཞན་ནས་སྲིབས་ཉམས་པའི་རྟགས་ཡིན།

གཉིས།  ལྕེ་མདོག་སེར་པོ།

སྤྱིར་ལྕེ་མདོག་སེར་པོ་མངོན་པ་ནི་མཁྲིས་པ་དང་ཚད་པའི་ནད་ཀྱི་སྤྱི་རྟགས་ཡིན། ལྕེ་མདོག་སེར་ལ་ནག་པོ་མངོན་པ་ནི་ཚད་པའི་ནད་ཀྱི་རྟགས་ཡིན། རྒྱ་ནག་གི་ལུགས་སུའང་ལྕེ་མདོག་སེར་པོ་མངོན་པ་མང་ཆེ་བ་གློ་ཚད་སོགས་ཚ་བ་ཁོང་དུ་གནས་པའི་རྟགས་དང་། ཡང་ན་ནད་བྱུང་མ་ཐག་པ་གསར་བའི་དུས་དང་ཁོང་ནད་གང་ཡིན་རུང་ཚད་པའི་མངོན་རྟགས་ཤིག་ཡིན་པར་གསུངས་ཡོད། གཞན་འཇུ་བྱེད་མ་ལག་གི་ནུས་པ་སྙོམས་སྒྲིག་ཤོར་བ་དང་། ཡང་ན་ལུས་ཀྱི་རིམས་འགོག་ནུས་པ་ཞན་པའི་རྟགས་སུའང་ལྕེ་མདོག་སེར་པོ་མངོན་པར་གསུངས་ཡོད།

གསུམ།  ལྕེ་མདོག་སྨུག་པོ།

ལྕེ་མདོག་སྨུག་ལ་སེར་ག་ཡོད་ན་ཕོ་མཆིན་དང་བད་ཀན་སྨུག་པོའི་རྟགས་ཡིན། ལྕེ་ཡོངས་སྨུག་པོ་ལྡན་ཚེ་དོན་སྣོད་ལ་ཚ་རྒྱས་པ་དང་ ལྕེ་སྟེང་ཁག་གཅིག་སྨུག་མདོག་ལྡན་ན་གནས་དེར་གཏོགས་པའི་རྩ་རྒྱུད་ལ་ཚ་རྒྱས་པའི་རྟགས་ཡིན། ལྕེ་མདོག་ཅུང་སྨུག་པ་དང་ལྕེའི་ངོ་བོ་རློན་པར་གནས་ན་གྲང་བའི་ནད་རྟགས་དང་། ལྕེ་མདོག་ཧ་ཅང་སྨུག་པ་དང་ལྕེའི་ངོ་བོ་སྐམ་ན་ཚ་བའི་ནད་རྟགས་ཡིན།

བཞི།  ལྕེ་མདོག་སྔོན་པོ།

ལྕེ་མདོག་སྔོན་པོ་མངོན་པ་ནི་གདོང་བརྟག་ལས། ལྕེ་མདོག་སྔོན་པོ་ཁྲག་དབུགས་གཉིས་ཀ་ཞན༎ གལ་ཏེ་ལྕེ་ཡོངས་སྔོ་ལ་དྲེག་ཡོད་ན༎ དོན་སྣོད་རྨས་སྐྱོན་ཐེབས་དང་ཚབས་ཆེན་མིན༎ སྔོ་ལ་དྲེག་མེད་ཁྲག་དབུགས་གཉིས་ཞན་དྲག། ཅུང་ཙམ་སྔོ་ལ་ལྕེ་ཡོངས་ཁྱབ་མེད་ཚེ༎ དྲོད་ཚ་འཇམ་ལ་དུག་ཕྱིར་མ་ཕུད་རྟགས༎ ལྕེ་དྲེག་འཇམ་ལ་ལྕེ་དཀྱིལ་སྔོན་པོ་ཞིག། ཡིན་དུས་སྲིབས་དུག་ཕོག་པའི་རྟགས་སུ་བཤད༎ དེང་རབས་གསོ་རིག་གིས་ཀྱང་ཁ་ལྕེ་སྔོན་པོར་གྱུར་པ་ནི་ལུས་ཁམས་སུ་དབྱང་རླུང་གི་མ་འདང་བའི་མངོན་རྟགས་གཙོ་བོ་ཞིག་ཏུ་བཞག་ཡོད།

ལྔ།  ལྕེ་མདོག་ནག་པོ།

ལྕེ་མདོག་ནག་པོ་ཆགས་པ་མང་ཆེ་བ་འཆི་ལྟས་སུ་འབྱུང་། གཞན་ད་དུང་དོན་ལྔའི་ནད་དང་དུག་ཕོག་པའི་རྟགས་སུའང་འབྱུང་།    སྙིང་ལ་ཚ་བ་རྒྱས་རྟགས་སུ་ལྕེ་རྩེ་མདོག་ནག་པོ་ཆགས་པ་དང་། སྙིང་ནད་ཀྱི་རྟགས་སུ་ཡང་ལྕེ་གཞུང་ནག་ལ་གས་པ། དུག་སྙིང་ལ་བབས་པའི་རྟགས་སུའང་ལྕེ་དཀྱིལ་ནག་པོར་འགྱུར་བ། མཁལ་ནད་ཀྱི་རྟགས་སུ་ལྕེ་མཐའ་ནག་པོར་འགྱུར་བ། མཆིན་པའི་ནད་ཀྱི་རྟགས་སུ་ལྕེ་སེར་ནག་ཆགས་པ་ཡིན།

སྤྱིར་མདོག་གཅིག་ཁོ་ན་ལྕེ་རྟགས་སུ་ཤར་བ་ཧ་ཅང་ཉུང་ལ་མང་ཤོས་ནི་ཁ་དོག་འགའ་འདྲེས་མར་འབྱུང་བ་ཡིན། མཚམས་རེར་ཁ་དོག་ཟབ་མིན་ལ་ཡང་ཁྱད་པར་ཡོད།  མཚམས་རེར་ལྕེ་སྟེང་དུ་མདོག་འགའ་མཚམས་ཕྱེ་ནས་རྐྱང་བར་འབྱུང་བ་སོགས་ལྕེ་མདོག་གི་མངོན་ཚུལ་ལ་རྣམ་པ་མི་འདྲ་བ་མང་བས། ལྕེའི་མདོག་དང་དྲེག་ཡོད་མེད་སོགས་ལས་རྗེས་དཔགས་ནད་ཀྱི་ཚ་གྲང་གི་དབྱེ་བ་དང་། ནད་ཚབས་ཆེ་མིན་སོགས་གསལ་བོར་རྟོགས་ཐུབ་པས་ལག་ལེན་ཁྲོད་ཤིན་ཏུ་དགོས་གལ་ཆེ་ཞིང་ནད་ངོས་འཛིན་པར་དོན་སྙིང་གལ་ཆེན་ལྡན། །

རྩོམ་སྒྲིག་པ། : ཀླུ་མོ་མཚོ།