ཉིན་རེར་ཆུ་འདང་ཚོད་བཏུངས་ན་ལུས་པོ་བདེ་ཐང་ཡོང་བ་དང་ཀླད་པ་འཁོར་སྐྱོད་བྱེད་པ་སོགས་ལ་ཕན་པ་ཆེན་པོ་ཡོད།ཉེ་ཆར།ཨ་མེ་རི་ཁའི《ཀློག་པ་པོའི་རྩོམ་ཡིག》ཅེས་པའི་དུས་དེབ་སྟེང་དེའི་ཐད་ཀྱི་ཕྱོགས་སྡོམ་ཞིག་བྱས་ཡོད་པ་སྟེ།
གཅིག ནུས་ཤུགས་སྔར་ལས་ཇེ་ཆེར་འགྲོ་བ། ཨ་རིའི་ལུས་རྩལ་གསོ་རིག་རུས་ནད་ཚན་ཁག་གི་སྨན་པ་ནཱ་ཝ་ལའོ་ཡིས་བཤད་རྒྱུར།ལུས་སྟེང་གི་ཆུ་ཤོར་རྗེས།ཕྲ་ཕུང་ནང་སྐྱིའི་སིམ་གཤིས་ཇེ་ཞན་དུ་སོང་ནས།སྐུལ་རྒྱུ་དང་འཚོ་བཅུད་དངོས་པོ་སྡུད་ལེན་བྱེད་པ་དང་སྙིགས་རོ་འདོར་བར་བཀག་འགོག་ཐེབས་པ་རེད།དེ་བས་ཉིན་རེར་ཆུ་ཕོར་བ6ནས8དང་ཕལ་ཆེར་ཀུང་ཧྲེང1.4ནས1.9འཐུང་དགོས།
གཉིས། སེམས་འཛིན་ཇེ་ཆེར་འགྲོ་བ། ཀླད་པའི་དབང་རྩ་འབུར་འབྲེལ་དང་དབང་རྩའི་ཕྲ་ཕུང་སོགས་གང་ཡིན་རུང་གཤེར་ཁུ་རིགས་མཁོ་བས།ལུས་སྟེང་གི་ཆུ་ཤོར་ན་སེམས་འཛིན་ཇེ་ཞན་དུ་འགྲོ་བ་དང་ལུས་ཤུགས་ཉམས་འགྲོ་བ་རེད།
གསུམ། བསམ་བློ་གཅིག་ཏུ་སྒྲིམ་པར་ཕན་པ།ཆུ་ཉུང་ཙམ་ཤོར་ནའང་ཀླད་པས་ཆ་འཕྲིན་བསྡུ་བའི་གོ་རིམ་ལ་གནོད་འཚེ་ཐེབས་ཏེ།བསམ་བློ་གཅིག་ཏུ་སྒྲིམ་པའི་ནུས་པར་གཏོར་བརླག་ཐེབས་པ་རེད།
བཞི། ལུས་ཕུང་སྔར་ལས་བཟང་ཞིང་མྱུར་ཚད་སྔར་ལས་མགྱོགས་པ།ལུས་སྟེང་གི་ཆུའི་འདུས་ཚད2%ཇེ་དམའ་རུ་སོང་ནའང་།ལུས་ཤུགས་དང་འགུལ་ཤུགས་མངོན་གསལ་གྱིས་ཇེ་དམའ་རུ་འགྲོ་ངེས་རེད།
ལྔ། ཞོར་ཟས་ཉུང་བཟའ་བྱེད་པར་ཕན་པ། ནམ་གུང་ཞོར་ཟས་མཐོང་ན་བཟའ་འདོད་སྐྱེས་པ་དེ་ནི་ཁ་སྐོམ་པ་ལས་བྱུང་བ་རེད།སྐབས་དེར་ཆུ་བཏུངས་ན་ཞོར་ཟས་བཟའ་འདོད་ཀྱི་འདུན་པ་འགོག་ཐུབ་པས།ལུས་པོའི་ལྗིད་ཚད་ལ་ཚོད་འཛིན་བྱེད་པར་ཕན་པ་ཡོད།
དྲུག འཇུ་ལམ་བདེ་ཐང་ཡོང་བར་ཕན་པ།གལ་ཏེ་ཁྱོད་ལ་རྒྱུན་དུ་བཤང་འགགས་པ་དང་ཕོ་བ་སྦས་པའི་སྣང་བ་སྐྱེས་ཚེ། ཆུ་མང་པོ་འཐུང་དགོས་ལ།ཆུ་འདང་ཚོད་ཅིག་བཏུངས་ན་མིའི་བཤང་འགགས་པ་ཇེ་ལྷོད་དུ་གཏོང་ཐུབ།
བདུན།ངོ་མདངས་ཇེ་ཡག་ལ་འགྲོ་བར་ཕན་པ།སྐྱི་པགས་ཀྱི་ཕྲ་ཕུང་གསར་སྐྱེས་འབྱུང་དགོས་ན་ཆུ་ལ་བརྟེན་དགོས།ཆུ་འདང་ཚོད་བཏུངས་ན་སྐྱི་པགས་ཇེ་འཇམ་ལ་སོང་སྟེ་ངོ་མདངས་ཇེ་ཡག་ལ་འགྲོ་བ་རེད།
བརྒྱད།ཚ་ནུས་ཀྱི་མཁོ་ཚད་ཇེ་དམའ་རུ་འགྲོ་བ། ཨ་མེ་རི་ཁའི་དབྱི་ལི་ནུའོ་སློབ་ཆེན་གྱིས་ཤེས་པ་ལྟར་ན།ཉིན་རེའི་ཆུ་འཐུང་ཚད་ཕོར་བ1ནས3ཇེ་མང་དུ་སོང་ན།ཟ་མ་བཟའ་ཚད་ཇེ་ཉུང་དུ་འགྲོ་བ་རེད།ཟ་མ་མ་ཟོས་གོང་དང་བཟའ་བའི་སྐབས་སུ་ཆུ་བཏུངས་ན་ཟ་མ་བཟའ་ཚད་ཇེ་ཉུང་དུ་འགྲོ་བས་ཚོ་བྱང་བར་ཕན་པ་ཡོད།
དགུ། རྒྱུག་པའི་སྐབས་སུ་དབུགས་མི་འཚང་བ། ལུས་སྦྱོང་བྱས་ཏེ་རྔུལ་ལངས་སུ་བཅུག་ན།ལུས་སྟེང་གི་གཤེར་ཁུ་ཤོར་འགྲོ་བས།གལ་ཏེ་གཤེར་ཁུ་ཁ་སྣོན་མ་བྱས་ན་ལུས་སྟེང་གི་ཆུ་ཤོར་བ་དང་ཚ་གདུག་གིས་བརྒྱལ་བའི་ཉེན་ཁ་ཆེ།
བཅུ། སེམས་ཁམས་སྐྱིད་པོ་ཡོང་བར་ཕན་པ། ཨ་རིའི་ཁང་ཉི་ཏིས་ཀད་སློབ་ཆེན་གྱིས་ཤེས་པ་ལྟར་ན།ལུས་སྟེང་གི་ཆུའི་འདུས་ཚད་ཇེ་དམའ་རུ་སོང་ན།མགོ་ན་བ་དང་ཐང་ཆད་པའི་སྣང་བ་འབྱུང་སླ་བས།སེམས་ཁམས་སྐྱིད་པོ་ཡོང་མི་ཐུབ་པ་བཅས་སོ། །