འབྲུག་ཆུ་ནས་བོན་གྱི་དཔེ་རྙིང་སྐོར་ཞིག་ཡང་བསྐྱར་གསར་རྙེད་བྱུང་བ།

1.jpg        ཟླ 5བའི་ཚེས 19ཉིན་ནས་ཚེས 27ཉིན་གྱི་བར། ཀན་ལྷོའི་གསར་འགྱུར་ཁང་དང་འབྲུག་ཆུ་རྫོང་གནའ་དཔེ་སྔོག་འདོན་དག་སྒྲིག་དང་རྒྱུད་འཛིན་སྲུང་སྐྱོབ་འགོ་ཁྲིད་ཚན་ཆུང་གི་མི་བརྒྱད་ཀྱིས་གྲུབ་པའི་འབྲུག་ཆུའི་བོན་གྱི་གནའ་དཔེ་རྟོག་ཞིབ་ཚན་ཆུང་གིས་སྔ་གཞུག་ཏུ་འབྲུག་ཆུའི་ཧྥུན་ཏས་དང་སྦྲ་རྫོང་། ཧན་པན། ཆུ་མགོ་ནང་། གོང་སྨད། བོད་ཡུལ་སོགས་ཤང་གྲོང་དུ་ཡང་བསྐྱར་དུ་གནའ་བོའི་བོན་གྱི་དཔེ་རྙིང་འཚོལ་སྒྲིག་བྱེད་པའི་བྱ་བ་སྤེལ། སྡེ་གྲོང་སོ་སོར་ཡང་བསྐྱར་དུ་བཅར་འདྲི་དང་འཚོལ་བསྡུ་ཞིབ་ཕྲ་བྱེད་པའི་བརྒྱུད་རིམ་ཁྲོད་མཐའ་འཁོབ་ལུང་ཁུག་གི་བོད་སྡེ་བཞི་རུ་བསྡོམས་པས་བོན་གྱི་དཔེ་རྙིང་པོད 16དང་ཤོག་ལྡེབ 4648མཆོད་ཆས 20གསར་དུ་རྙེད། འདི་ནི 2015ལོར་འབྲུག་ཆུ་རྫོང་དུ་བོན་གྱི་ཡིག་རྙིང་གསར་དུ་རྙེད་པ་ནས་བཟུང་ཡང་བསྐྱར་གསར་རྙེད་ཆེན་པོ་བྱུང་བ་ཞིག་རེད།

2.jpg

       ཐེངས་འདིར་གསར་དུ་རྙེད་པའི་བོན་གྱི་དཔེ་རྙིང་གི་འབྲི་ཤོག་རྙིང་ཧྲུལ་དུ་གྱུར་པ་མ་ཟད། གླེགས་བམ་རེ་རེའི་ཆེ་ཆུང་འདྲ་མིན་དང་ཤོག་རྒྱུ་མཁྲེགས་པོ་དང་ཤོག་ལྡེབ་མང་པོ་ལྷན་དུ་འབྱར་ཞིང་། ཤོག་ངོས་རྩུབ་རག་ཆགས། བྲིས་ཆ་ལ་གསེར་བྲིས་དང་དངུལ་བྲིས། མཚལ་བྲིས། སྣག་བྲིས་ཡོད་པ། དབུ་ཤོག་ཏུ་མཚན་བྱང་ལས་གཞན་རྒྱན་རིས་སྣ་ཚོགས་དང་བྱ་ཁྱུང་སོགས་རི་མོས་བརྒྱན་ལ་མཚོན་མདངས་བཀྲ། དཔེ་རྙིང་གི་འབྲི་སྟངས་ལ་དབུ་ཅན་དང་དབུ་མེད། འཁྱུག་བྲིས། ཚུགས་མ་འཁྱུག་སོགས་ཡོད་པ་དང་། དབུ་མེད་སུག་ཐུང་གི་ཡིག་ཕྲེང་དུ་སྐུང་ཡིག་ཅུང་མང་ཞིང་ཨང་ཡིག་དང་གཟུགས་མཚོན་ཡི་གེའང་མང་པོ་ཡོད། དཔེ་རྙིང་འདི་དག་གི་ལོ་ཚིགས་རིང་བ་དང་ཉར་འཇོག་ཆ་རྐྱེན་ཞན་པའམ་བདག་དམ་མ་ལེགས་པའི་སྟབས་ཀྱིས་དཔེ་རྙིང་གི་དྲས་མཚམས་ཐེད་པོར་གྱུར་ཏེ་ཡི་གེའི་ངོས་མི་ཟིན། དཔེ་རྙིང་ལ་ལ་རྙིང་རུལ་དུ་གྱུར་ནས་ཡི་གེར་སླད་སྐྱོན་བྱུང་བའམ་འབྱར་ནས་ཁ་ཕྱེ་མི་ཐུབ། རྟོག་ཞིབ་ཚན་ཆུང་གིས་ཕྱོགས་གཅིག་ནས་རྙེད་པའི་དཔེ་རྙིང་དག་སྒྲིག་དང་པར་བཤུས་བྱེད་ཅིང་། ཕྱོགས་གཞན་ཞིག་ནས་དཔེ་རྙིང་ཉར་མཁན་ཁྱིམ་ཚང་གི་དཔེ་རྙིང་དང་མཆོད་ཆས་ཐོ་འགོད་བྱས། བརྙན་གཟུགས་དང་སྒྲ་ཕབ་ཀྱི་ཐབས་སྤྱད་དེ་རིན་ཐང་ཆེ་བའི་ཐོག་མའི་དཔྱད་ཡིག་མང་པོ་བསྡུ་རུབ་བྱས།

3.jpg

       དགུང་ལོ་གོ་བརྒྱད་སོན་པའི་གྲོང་སྔགས་ཅིན་བཟང་པོས་ངོ་སྤྲོད་བྱས་པ་ལྟར་ན། ཁོ་ཚང་གི་མེས་པོ་རབས་དྲུག་ནི་བོན་ཆོས་ཉམས་ལེན་གྱི་ཁྱིམ་རྒྱུད་ཡིན་པ་དང་། ཁོང་གི་ཨ་མྱེས་གསུངས་པ་ལྟར་ན་དཔེ་རྙིང་འདི་དག་ནི་སྟག་གཟིག་ནས་བྱུང་བ་དང་ཞང་ཞུང་ནས་དར། མི་རབས་ནས་བརྒྱུད་པའི་ཡུལ་ལྷ་གཞི་བདག་མཆོད་བཀུར་བྱེད་པའི་གཅེས་ནོར་དུ་གྱུར། རང་ཁྱིམ་དུ་ཉར་བའི་དཔེ་རྙིང་མང་པོ་གྲལ་རིམ་འཐབ་རྩོད་ཀྱི་ལས་འགུལ་དུ་ཉར་ལོངས་མ་བྱུང་བར་གཞུང་བཞེས་དང་མེ་རུ་བསྲེགས། ད་ལྟར་ཡོད་པའི་དཔེ་རྙིང་འདི་དག་ནི་སྐབས་དེར་སྲོག་ཉེན་ལ་མ་འཛེམས་པར་སྡེ་བའི་རྒྱབ་རིའི་བྲག་ཕུག་ཏུ་སྦས་ནས་ད་གཟོད་ད་ལྟའི་བར་དུ་གསང་བའི་སྒོ་ནས་ཉར་ཐུབ་པ་བྱུང་ཟེར།

     4.jpg

      ཐེངས་འདིར་གསར་དུ་རྙེད་པའི་བོན་ཆོས་ཀྱི་ནང་དོན་ལ་བོད་ཁུལ་གྱི་རི་ཀླུང་དང་ཡུལ་ལྷ་གཞི་བདག་གི་བྱུང་བ། ལྷ་སྲུང་གི་མཆོད་བཀུར། མོ་དང་རྩིས་དཔྱད་སོགས་འདུས་ཡོད། ཡིག་རྙིང་གི་ཚིག་ཕྲེང་མང་པོར་སྟག་གཟིག་དང་ཞང་ཞུང་། སུམ་པ། རྒྱ་སྐར། རྒྱ་ནག་སོགས་ཀྱི་ནང་དོན་བཀོད་འདུག བོན་གྱི་ཡིག་རྙིང་འདི་དག་གི་འབྲི་སྟངས་ལ་ཐུན་མོང་མ་ཡིན་པའི་ཁྱད་ཆོས་ལྡན་པས། ཡི་གེར་བྲིས་པའི་ལོ་ཚིགས་ད་དུང་ཞིབ་འཇུག་གིས་བདེན་དཔང་བྱ་དགོས། དེ་དག་ལས་བོད་ཀྱི་ས་མིང་རིག་གནས་དང་ཡུལ་ལྷ་གཞི་བདག་རིག་གནས། གདོད་མའི་བོན་གྱི་རིག་གནས། དམངས་སྲོལ་རིག་གནས་སོགས་ཞིབ་འཇུག་བྱེད་པར་ཁོངས་བཅོལ་གྱི་རྒྱབ་རྟེན་འདོན་སྤྲོད་བྱས་ཡོད།

5.jpg        རྟོག་ཞིབ་ཚན་ཆུང་གིས་བོད་ཡིག་གི་གནའ་དཔེ་འཚོལ་བསྡུ་དག་ཞིབ་ཀྱི་བྱ་བའི་ཞོར་དུ་སྔ་གཞུག་ཏུ་རྫོང་མི་དམངས་སྨན་ཁང་དུ་སྨན་བཅོས་བྱེད་བཞིན་པའི་བོན་གྱི་དཔེ་རྙིང་རྙེད་པ་སྔ་བའི་གྲོང་སྔགས་དབྱང་འཇིགས་བྱེད་དང་དཔེ་རྙིང་ཉར་མཁན་གཞན་པའི་ཁྱིམ་དུ་སོང་ནས་ཁོང་ཚོར་འཚམས་འདྲི་བྱས།།   

6.jpg


རྩོམ་སྒྲིག་པ། རིག་འཛིན་ཚེ་རིང་།

དཔྱད་མཆན 0 ཡོད།