ཀྲུང་གོ་བོད་ཀྱི་དྲ་བ།

གནས་ཆུང་རྡོ་རྗེ་སྒྲ་དབྱངས་གླིང་།

ཡོང་ཁུངས། : «ལྷ་སའི་དགོན་ཐོ་»     སྤེལ་དུས། : 2016-08-11
ཡིག་གཟུགས། :ཆུང་། འབྲིང་། ཆེ།

       གྲུབ་མཐའ། རིས་མེད་ལ་གཙོ་བོ་དགེ་ལུགས་དང་རྙིང་མ། ཆགས་ཡུལ། ལྷ་སའི་ནུབ་ངོས་འབྲས་སྤུངས་དགོན་གྱི་ཉེ་འདབས། འདེབས་ལོ། སྤྱི་ལོ་༡༦༨༡། འདེབས་མཁན། སྡེ་སྲིད་སངས་རྒྱས་རྒྱ་མཚོ།

   དགེ་འདུན་གྱི་ཞལ་གྲངས་ལ་སྡེ་སྲིད་སངས་རྒྱས་རྒྱ་མཚོས་བརྒྱ་དང་གཅིག་འཛུགས་པ་གནང་ཞིང་། རྒྱལ་དབང་སྐུ་ཕྲེང་བཅུ་གསུམ་པའི་སྐབས་སུ་དགེ་འདུན་གྱི་ཞལ་གྲངས་བརྒྱ་དང་བཅོ་ལྔའི་ཚད་གཞི་བཟོ་གནང་མཛད་པས་ཕྱིས་སུ་སྤྱི་ལོ་༡༩༥༩ལོའི་བར་དེ་ལྟར་གནས། དགོན་པ་དེའི་སྒྲིག་གཞིའི་ལས་སྣེ་མི་སྣ་ནི་གནས་ཆུང་ཆོས་སྐྱོང་གི་སྐུ་རྟེན་ཏཱ་བླ་མ་དང་། དེའི་འོག་གནས་ཆུང་སྡེ་པ། མཆོག་སྤྲུལ་རིན་པོ་ཆེ། དེའི་འོག་སློབ་དཔོན། དབུ་མཛད། དགེ་བསྐོས། ཆོས་སྐྱོང་གི་དྲུང་ཡིག་དང་། སྐུ་མདུན་ཞེས་ཆོས་སྐྱོང་སྐུ་ཕེབས་སྐབས་ཞབས་ཞུ་བ་གཉིས་སོགས་ཡོད།

   གནང་ཆུང་ཆོས་སྐྱོང་ངམ་རྒྱལ་པོ་སྐུ་ལྔ། བྱང་ཕྱོགས་འཕྲིན་ལས་རྒྱལ་པོའི་བཀའ་ཡི་བློན་པོ། རྡོ་རྗེ་གྲགས་ལྡན་པེ་ཧར་རྒྱལ་པོ་སོགས་དོན་གཅིག་མིང་གི་རྣམ་གྲངས་ཡིན་ཞིང་ཆོས་སྐྱོང་འདིའི་ཐོག་མའི་འབྱུང་ཁུངས་སྐོར་ལ་སྔར་མཁན་སློབ་ཆོས་གསུམ་གྱིས་བསམ་ཡས་མི་འགྱུར་ལྷུན་གྱི་གྲུབ་པའི་གཙུག་ལག་ཁང་ལེགས་པར་གྲུབ་ཏེ་གནས་སྲུང་དུ་བསྐོ་བའི་བཀའ་བགྲོས་མཛད་ཚུལ་དང་། དེ་ནས་རྒྱལ་དབང་དགེ་འདུན་རྒྱ་མཚོས་དཔལ་ལྡན་འབྲས་སྤུངས་དགོན་གྱི་སྲུང་མར་བསྐོས་པ་བཅས་ཀྱི་ལོ་རྒྱུས་སྐོར་རྒྱལ་དབང་ལྔ་པ། སྡེ་སྲིད་སངས་རྒྱས་རྒྱ་མཚོས་མཛད་པའི་གནས་ཆུང་དཀར་ཆག་དང་། འབྲས་དགོན་ཕྱག་འདེབས་པ་པོ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་གྱི་རྣམ་ཐར་སོགས་ཁུངས་བཙན་གྱི་ལོ་རྒྱུས་ཡིག་ཆར་ཞིབ་པར་གསལ། དེ་སྔ་བོད་ས་གནས་སྲིད་གཞུང་གིས་གལ་ཆེའི་བསྟན་སྲིད་གཞུང་དོན་ཁག་དང་། ལྷག་པར་དུ་རྒྱལ་དབང་རིམ་བྱོན་གྱི་སྐུ་སྐྱེ་ཡང་སྲིད་གངས་ཅན་ས་ཕྱོགས་ག་གེ་མོར་སྐུ་འཁྲུངས་ཡོད་པ་སོགས་ཀྱི་སྐོར་ལ་ཆོས་སྐྱོང་འདི་ཡི་བཀའ་ལུང་རྟེན་སྲོལ་ཡོད་པ་རྒྱལ་དབང་རིམ་བྱོན་གྱི་རྣམ་ཐར་ཕལ་མོ་ཆེར་གསལ་བ་ལགས་སོ། །

   དགོན་པ་འདིའི་ཆོ་ག་ཕྱག་ལེན་བཞེས་ཚུལ་ཐད། གོང་གསལ་ལྟར་དགོན་པ་འདི་ནི་ས། དགེ རྙིང་གསུམ་གྱི་གྲུབ་མཐའ་རིས་མེད་ཡིན་ཞིང་། གཞི་གསུམ་ཆོ་ག་གཙོ་བཟུང་ཐོག འཇིགས་བྱེད་ལྷ་བཅུ་གསུམ་གྱི་དབང་ཆོག་རྒྱུད་སྟོད་ལུགས་ཆ་ཚང་དང་། རྩོད་གྲྭའི་རྩིས་སྡོམས་ཁྲིད་བྱང་གིས་ལོ་གསུམ་རེ་མི་བརྒྱད་རེ་ཟུར་དུ་དང་གཡང་ཆོག ནོར་བུ་མཆོག་བརྒྱ་དང་། མཁའ་འགྲོ་ནོར་ལྷ། གནོད་སྤྱིན་ནོར་ལྷ་ནག་པོའི་སྐོར་གྱི་གཡང་ཆོག རྩ་གསུམ་ནང་ཐུགས་རྗེ་ཆེན་པོ་དུག་ལྔ་རང་གྲོལ་སྐོར་སོགས་རྙིང་ལུགས་ལྷོ་གཏེར་བཞེད་པ་དང་། ཐུགས་རྗེ་ཆེན་པོ་སྤྱན་རས་གཟིགས་ཕྱག་བཞིའི་དབང་ཆོག་དང་བྱང་བསྔོ། ཁ་སྐོང་སྦྱིན་སྲེག་སོགས་རྙིང་ལུགས་བྱང་གཏེར་བཞེད་པ། རྣལ་འབྱོར་མའི་སྐོར་ས་སྐྱའི་ལུགས་བཞེད་པ་བཅས་སོ།།

  རྒྱལ་མཆོག་ལྔ་བའི་གནས་ཆུང་དཀར་ཆག་དང་སྡེ་སྲིད་སངས་རྒྱས་རྒྱ་མཚོས་ལྷན་ཐབས་སུ་མཛད་པའི་གནས་ཆུང་དཀར་ཆག་གནས་ཆུང་བདེ་ཡངས་ལྷོ་ངོས་རྩིག་བྲིས་སུ་བཀོད་ཡོད་པ་དེ་སྤྱི་ལོ་༡༩༨༤ལོར་བོད་ལྗོངས་སྤྱི་ཚོགས་ཚན་རིག་ཁང་ཆོས་ལུགས་ཞིབ་འཇུག་ཚན་པས་འདྲ་བཤུས་བྱས་ཏེ་ཡིག་འབྲུ་རེ་རེ་བཞིན་ཞུ་དག་ནན་ཏན་ཞུས་ནས་པར་དུ་བཀོད་ཟིན་པ་ཡིན།

 ཞིབ་ཕྲའི་ལོ་རྒྱུས་སྤྱི་ཚོགས་ཚན་རིག་ཁང་ཆོས་ལུགས་ཞིབ་འཇུག་ཚན་པས་རྩོམ་སྒྲིག་ཞུས་པའི་«འབྲས་སྤུངས་ཆོས་འབྱུང་དྭངས་གསལ་ཤེལ་གྱི་མེ་ལོང་»ཞེས་པར་གསལ།

རྩོམ་སྒྲིག་པ། : རིག་འཛིན་ཚེ་རིང་།