སྒྲུང་གཏམ《འུར་ཆོམ་དང་འཁྲུག་ཟིང》ཞེས་པ་ཀློག་འགྲེལ།གཉིས་པ།

 (པར་ངོས14པར་མཐུད་པ།)

    གཉིས་པ། བརྩམས་ཆོས་ངོ་སྤྲོད། 
    《འུར་ཆོམ་དང་འཁྲུག་ཟིང》(《喧哗与骚动》)ནི་ཧྥུའུ་ཁུ་ནཱའི་ཚབ་མཚོན་བརྩམས་ཆོས་ཡིན་ཞིང་། སྒྲུང་གཏམ་འདིའི་ཁ་བྱང་ནི་ཤིག་སེ་ཕེར་གྱི་ཟློས་གར་འཁྲབ་གཞུང《མེ་ཁུ་པེ》(《麦克白》)ཞེས་པའི་ཁྲོད་ཀྱི་གར་སྟེགས་འཁྲབ་ཚིག་གྲགས་ཅན་ཏེ། མི་ཚེ་ནི་གླེན་པས་གཉིད་བཤད་རྒྱག་པ་ནང་བཞིན། འུར་ཆོམ་དང་འཁྲུག་ཟིང་ཁོ་ནས་བཀང་བ་ལས། སྙིང་བོ་ཅི་ཡང་མེད་ཅེས་པ་ལས་བྱུང་བ་ཡིན། བརྩམས་ཆོས་འདིས་ཨ་རིའི་ལྷོ་ཕྱོགས་ཀྱི་ཁང་ཕོའུ་ཧྲིན་ཁྱིམ་རྒྱུད་ཆེན་མོ་ཉམས་རྒུད་དུ་འགྲོ་བཞིན་པའི་སྐྱོ་གར་བྲིས་ཡོད། བརྩམས་སྒྲུང་འདི་ཁྱོན་བསྡོམས་ཚན་པ་བཞིས་གྲུབ་ལ། ཚན་པ་དང་པོའི་ཁ་བྱང་ལ1928ལོའི་ཟླ4པའི་ཚེས7ཉིན་ཞེས་བྲིས་ཡོད། ཚན་པ་འདིའི་ཁྲོད་དུ་གཙོ་བོ་ཁྱིམ་རྒྱུད་ཀྱི་བུ་ཆུང་བ་པན་ཅེ(班吉)ཡི་འོག་འགྱུའི་སེམས་རྣམ་བྲིས་ཡོད། པན་ཅེ་ནི་གླེན་པ་ཞིག་ཡིན་པ་དང་། ལོ་སོ་གཅིག་ལ་སོན་ཡོད་ནའང་ཁོའི་རིག་སྟོབས་ནི་བྱིས་པ་ལོ་གསུམ་ཅན་ཞིག་དང་འདྲ་མཚུངས་ཡིན། ཁྱིམ་དུ་ཁོ་ལ་ཤ་ཚ་སྙིང་ཉེ་བྱེད་མཁན་གཡོག་མོ་ཏིས་ཨར་ཞི་ལས་གཞན། ཁོ་ལ་བྱམས་སྐྱོང་ཚད་མེད་གནང་མཁན་ནི་ཁོའི་ཨ་ཅེ་ཁེ་ཏིས་རེད། ཁོར་ཨ་ཅེ་ལགས་ཀྱི་གམ་ནས་ཨ་མའི་བྱམས་བརྩེ་རིགས་གཞན་ཞིག་ཐོབ་པ་དང་། ནམ་རྒྱུན་ཨ་ཅེ་ཡི་ལུས་སྟེང་ན་རྒྱུ་བའི་ཆར་བ་འབབ་མཚམས་བཞག་མ་ཐག ནགས་ཀློང་དཀྱིལ་ནས་ལྡང་འོང་བའི་ལྗོན་ཤིང་གི་དྲི་མ་དང་ཀུན་ནས་མཚུངས་པའི་ལུས་དྲི་ཞིམ་པོ་དེས། ནམ་རྒྱུན་ཁོར་བདེ་སྡོད་བག་ཡངས་ཀྱི་དབུགས་འབྱུང་ཅི་འདོད་བསྩལ། ཁོའི་རིག་སྟོབས་ལ་ཚད་བཀག་ཡོད་ལ་དྲན་པ་མག་མོག་ཏུ་སྣང་བས། དུམ་ཚན་འདིའི་ནང་པན་ཅི་ཡི་གོ་རིམ་འཆོལ་ལ་རྙོག་ཟིང་འདྲེས་མའི་དྲན་ཤེས་མག་མོག་ཞིབ་འབྲི་བྱས་པ་བརྒྱུད། དེའི་ཁྲོད་ཁང་ཕོའུ་ཧྲིན་ཁྱིམ་རྒྱུད་ཀྱི་བྱིས་པ་ཚོའི་ནར་སོན་གྱི་ལོ་ཟླའི་བརྙན་རིས་གསལ་ལ་མི་གསལ་བའི་ངང་མངོན་ཡོད། 
    ཚན་པ་གཉིས་པའི་ཁ་བྱང་ལ1910ལོའི་ཟླ6པའི་ཚེས2ཉིན་ཞེས་བྲིས་ཡོད། ཚན་པ་འདིའི་ཁྲོད་དུ་ཁྱིམ་རྒྱུད་ཀྱི་བུ་ཆེ་བ་ཁོན་ཏིན(昆丁)རང་ཤི་བརྒྱབ་པའི་སྐོར་གྱི་བརྒྱུད་རིམ་དང་། ཁོའི་འཆི་ཁ་མའི་མགོ་མཇུག་མེད་པའི་ནང་སེམས་ཀྱི་འཆར་སྒོ་མ་ལུས་མཚོན་པར་བྱས་ཡོད།ཁོན་ཏིན་ནི་ཁྱིམ་རྒྱུད་ཀྱི་བུ་ཆེ་བ་ཡིན་ཁར། ཧྭ་ཧྥུ་སློབ་ཆེན་གྱི་སློབ་མ་ཡིན་ནའང་། ཁོས་ཁྱིམ་རྒྱུད་ཀྱི་ཉམས་རྒུད་དང་ཁྱིམ་ཚང་ལ་གནས་པའི་འཁྲུག་ཟིང་བཟོད་ཀྱིན་མེད་པར་མ་ཟད། ད་དུང་སྲིང་མོ་ཁེ་ཏིས(凯蒂)ཡིས་རང་ལུས་གཙང་མ་སྲུང་མ་ཐུབ་པ་ནི་ཁྱིམ་རྒྱུད་ཀྱི་ངོ་ཚ་དང་ཞབས་འདྲེན་ལྟ་བུར་སྣང་སྟེ། སྡུག་བསྔལ་གྱི་ཁྲོད་ནས་རང་ཤི་རྒྱག་རྒྱུར་སེམས་ཐག་བཅད་ནས། ཕ་རྒན་གྱིས་ཁོར་བྱིན་པའི་ལག་འདོགས་དུས་ཚོད་ཧྲུག་ཆག་ཏུ་བཏང་རྗེས། གཙང་པོའི་ནང་དུ་མཆོངས་ནས་ཚེ་འཕོས། 
    ཚན་པ་གསུམ་པའི་ཁ་བྱང་ལ1928ལོའི་ཟླ4པའི་ཚེས6ཉིན་ཞེས་བྲིས་ཡོད། ཚན་པ་དེའི་ནང་བུ་འབྲིང་བ་ཅེ་ཧྲིན(杰生)གྱི་སེམས་ཁམས་ཞིབ་འབྲི་བྱས་ཡོད། ཅེ་ཧྲིན་ནི་ཁྱིམ་རྒྱུད་ཀྱི་བུ་འབྲིང་བ་ཡིན་ལ། ཁོ་བུ་ཆེ་བ་ཁོན་ཏིན་དང་རྦད་དེ་མི་འདྲ་བར། སྒེར་སེམས་ཆེ་ལ་རང་ཉིད་ཀྱི་ཁེ་ཕན་ཁོ་ནའི་རྗེས་སུ་འགྲོ་ལྡོག་བྱེད་མཁན་འབའ་ཞིག་ཡིན། ཁོས་ནམ་རྒྱུན་རང་ཉིད་ནི་ཁྱིམ་མི་དག་ལས་ཆེས་གྱོང་རེག་མཁན་ཞིག་ཡིན་པར་འདོད་ཀྱིན་ཡོད། ཁོས་རྒྱུན་པར་སྲིང་མོ་ཁེ་ཏིས་ལ་སྡང་བོ་བྱེད་པ་ལས་གཞན། ཁོའི་ཚ་མོ་སྟེ་ཁེ་ཏིས་ཡི་བུ་མོ་ཁོན་ཏིན་ལའང་ངན་སེམས་བཅངས། ད་དུང་ཁོས་ཁེ་ཏིས་ཀྱིས་རང་གི་ཡུལ་བསྐྱུར་བུ་མོ་ཁོན་ཏིན(小昆丁)ལ་སྒོར་མོ་བསྐུར་བ་ཕྲོགས་ནས་རང་རྒྱུ་བྱས། ཁོས་རང་གི་སྤུན་ཆུང་གླེན་པ་པན་ཅེ་ལ་ཤ་ཚ་སྙིང་རྗེ་དང་བྱམས་སྐྱོང་མི་གནང་ཁར། པན་ཅེ་སྨྱོན་པའི་གླིང་དུ་བསྐྱལ་བར་རེ་སྒུག་བྱས་ནས་བསྡད། ཁོ་རང་སྤྲོ་ཐུང་ཙབ་ཙུབ་བྱེད་མཁན་ཞིག་ཡིན་ཞིང་། བཀྲ་མི་ཤིས་པའི་དོན་དག་ཅི་བྱུང་ཚང་མ་གཞན་གྱི་སྟེང་དུ་ཁག་འགེལ་དང་ལེ་འདེད་བྱ་རྒྱུར་དགའ་བར་མ་ཟད། རང་ཉིད་ནམ་རྒྱུན་གནོད་འཚེ་མྱོང་མཁན་གྱི་ངང་ཚུལ་འཛིན་རྒྱུར་ཧ་ཅང་མཁས། ཅེ་ཧྲིན་གྱི་སྟེང་ནས་ད་གཟོད་ཉམས་རྒུད་དུ་འགྲོ་བཞིན་པའི་ཁྱིམ་རྒྱུད་འདིའི་ཡ་ང་སྙིང་རྗེ་བྲལ་བའི་སེམས་གཤིས་མཚོན་སླ་བར་མ་ཟད། ད་དུང་ཨ་རིའི་ལྷོ་ཕྱོགས་ཀྱི་གནའ་བོའི་ཞི་དུལ་དང་བག་ཕེབས། སྒེར་སེམས་མེད་པ། ཕན་ཚུན་རོགས་རེས་མཉམ་གནས་བཅས་ཀྱི་ཁྱད་ཆོས་ལྡན་པའི་སྲོལ་རྒྱུན་ཀུན་སྤྱོད་ཉམས་དམས་སུ་སོང་ཚར་བ་མངོན་ཐུབ། 
    ཚན་པ་བཞི་པའི་ཁ་བྱང་ལ1928ལོའི་ཟླ4པའི་ཚེས8ཉིན་ཞེས་བྲིས་འདུག ཚན་པ་འདིའི་ཁྲོད་གཙོ་བོ་ཁྱིམ་གཡོག་མ་ཏིས་ཨར་ཞི་ཡི་སྐོར་བྲིས་ཡོད། མགོའི་ཚན་པ་གསུམ་ནི་མི་སྣའི་གཤིས་ཀ་དང་ཐོབ་ཐང་གི་དབང་གིས་ཞིབ་འབྲི་བྱས་པ་རྙོག་ཟིང་དང་འཐོར་གྱར་ཡ་བྲལ་ལྟ་བུར་སྣང་བས། ཚན་པ་འདིའི་ཁྲོད་རྩོམ་པ་པོས་ཆེད་དུ་འབོད་པའི་ཐ་སྙད་གསུམ་པ་སྤྱད་དེ། ཀློག་མཁན་རྣམས་ལ་སྒྲུང་གི་བྱུང་རིམ་ཁ་གསལ་ཞིབ་ཕྲ་གནང་མ་ཐུབ་པའི་སྐོར་ཁ་གསབ་བྱས་ཡོད། ཟླ4པའི་ཚེས8ཉིན་ནི་ཏག་ཏག་འདས་ལོག་དུས་ཆེན་ལ་འཁེལ་ཡོད་ནའང་། ཁྱིམ་ཚང་དེ་དོན་རྐྱེན་གཅིག་གིས་ཟང་ཟིང་ལང་ལོང་དུ་བཏང་། དེ་ནི་ཁེ་ཏིས་ཀྱི་བུ་མོ་ཁོན་ཏིན་གྱིས་ཅེ་ཧྲིན་གྱི་གསོག་དངུལ་སྒོར་སྟོང་བདུན་ལྷག་ཡོད་པ་བརྐུས་ནས། ཁོ་མོའི་དགའ་རོགས་དང་མཉམ་དུ་ཡུལ་གཞན་ལ་བྲོས་བྱོལ་དུ་སོང་། ཅེ་ཧྲིན་ཁོང་ཁྲོ་རབ་ཏུ་འབར་བའི་ངང་ར་མདར་སོང་ནས་གང་སར་བཙལ། ཉིན་དེར་ཏིས་ཨར་ཞི་ཡིས་ཁྱིམ་མི་གཞན་དག་དང་པན་ཅེ་བཅས་ཆོས་ཁང་དུ་ཁྲིད་ནས། སྐྱབས་འཇུག་དང་གསོལ་འདེབས། ཕག་བསྐོར་བཅས་ཚར་རྗེས། ཕྱིར་ཤིང་རྟ་འཁོར་ལོར་བསྡད་ནས་རང་ཁྱིམ་དུ་ལོག་པའི་གོ་རིམ་བྲིས་ཡོད། ཏི་ཨར་ཞི་ནི་ཁྱིམ་འདིའི་ཁོངས་མི་ངོ་མ་ཞིག་མིན་ནའང་། དུས་ཡུན་རིང་བོར་ཁང་ཕོའུ་ཧྲིན་ཁྱིམ་ཚང་ནས་གཡོག་ལས་བྱས་ཏེ་འཚོལ་བ་བསྐྱལ་བས། ཁོ་མོའི་སྟེང་ནས་ཀྱང་ཁྱིམ་རྒྱུད་འདིའི་ལོ་རྒྱུས་ཀྱི་འཕོ་འགྱུར་མཚོན་སླ་བ་ཡིན།   (མུ་འགོད།)  

  མཚོ་སྔོན་བོད་ཡིག་གསར་འགྱུར།2015·01·02།པར་ངོས15པ།

རྩོམ་སྒྲིག་པ། རིག་འཛིན་ཚེ་རིང་།

དཔྱད་མཆན 0 ཡོད།